বানের পানি কমি যায়া জাগিয়া উঠিল ভূই, টাকা পৈসা হাতত নাই কি যে করং মুই। বানের পানি সইগে খায়া করিয়া গেইছে ধুইয়া, খালি পেটত শান্তি না পাং খায়া আলোয়া গুইয়া। ছাওয়া গুলার ধইরছে অসুখ ছাইরবারে না চায়, তিনদিন ধরি জরত পড়ি কাতারায় ছাওয়ার মায়। ছোট ছাওয়াটার কিযে হইছে পেটটা টুম টুমা, বেলা ডোবার সাথে বাহে ঘরত দেই ধুমা। মশাগুলার যন্তনাতে ঘুমে না ধরে, বড় ছাওয়াটার ডায়রিয়া ভাই এই বাঁচে এই মরে। ঘরত খাবার যেইকনা আছিল বানত খাইলং বসি, কাইও হামাক দেখে না বাহে বানত সৈগে গেইছে ভাসি। হাল কৃষি আর করমো কিদি টাকা পৈসাও নাই, হামারগুলার খবর নিবে আছে কোনবা ভাই। ছাওয়ায় পোয়ায় পাঁচ জন মানুষ কি দিয়া কি করি, এক সার আটার রুটি নিয়াও টানা টানিত পরি। মাথাটা মোর আউলিয়া গেইল বানের পানি যায়া, কি দিয়া যে আবাদ করমো বাঁচমো কি যে খায়া।